كأول دولة عربية، مصر قريبة من الانضمام لـ بريكس ووداعا لأوروبا وأهلا بكم في العالم الجديد

 مصر قريبة من الانضمام لـ بريكس ووداعا لأوروبا وأهلا بكم في العالم الجديد

 كتابة : أحمد مصطفي

علي الرغم من ان مجموعة العشرين مازالت فوية ، وحقيقي ان حلف الناتو مازال الاضخم والاقوي ، وفعلا ان السبعه الكبار لسه كبار ، لكن قريب ممكن يتغير كل شيء ، او ممكن نقول انه فعلا بدا بالتغيير .

وهنا هنرسم ملامح العالم الجديد اللى ممكن يكون للعرب نصيب فيه :

في سنه 2001 جيم اونيل الرئيس السابق لشركة جودمان ساكس لادارة الاصول صاغ لاول مرة  "مصطلح "B R I C

في وصفه  "الاسواق الدولية الكبري الناشئه" ، وكانت وقتها البرازيل  وروسيا  و الهند و الصين وبعدين انضمت ليهم جنوب افريقيا ، فاخرجت لينا   "بريكس" ، اول ما الفكرة بدأت تطرح عن حلف تجاري اقتصادي جديد استغل الرئيس الروسي فلاديمير بوتين الفكرة وخصوصا بعد ان سيطر الغرب علي جميع التحالفات الاقتصادية وعسكرية ، زي "مجموعة السبع " و "مجموعة العشرين"  و "الناتو" ومش بس بوتين لوحده لكن حتي الصين والهند والبرازيل كلهم كانوا عايزين منصة تنافس دولي علشان تنهي احتكار الغرب للسوق وعلشان كده اتأسست مجموعة "بريكس"

مش بس نادي اقتصادي لكبار جداد ولكن اكتر من كده بكتير ، والكتير ده كان ليه تخطيط تاني لاشخاص عايزين يسيطروا علي العالم زي روسيا والصين .

جيم اونيل

وبالفعل سنه 2006 اعلن عن ولادة الاعب الاقتصادي الجديد في اربع دول هم "روسيا والصين والهند والبرازيل" ، وانضمت ليهم جنوب افريقيا سنه 2010 ، ومجموع الخمس دول دي بيضموا نحو 40% من تعداد سكان العالم وكان بيسيطروا علي تلت اقتصاد الكوكب ، وكان كل اللى عايزينه في 2009 انه يكون فيه عالم جديد ويكون ثنائي القطب ، لكن لان الاقتصاد لوحده مش كافي فكان لازم يكون فيه قوة عسكرية تدعمه ، وده اللى اتكفلت بيه  روسيا اللى استهوتها المغامرات العسكرية اللى كان اخرها في اوكرانيا ، وكانت الحرب دي زي مابنقول انها اطلقت رصاصة الرحمة علي  ما يسمي بالعالم القديم ، او "العالم احادي القطب" اللى بتتزعمه امريكا ، اللى من الواضح انها لسه لحد دلوقت مهيمنه علي العالم ، لكن الحقيقة عكس كده تماما وخصوصا الرصاصة الاخيرة اللى خدتها امريكا من العرب في اخر زيارة للرئيس الامريكي "جو بايدن"  ، وده لما راح بايدن زار الدول العربية علي امل انه يرجع للمنطقة مرة تانيه عشان يكونوا مكان الصين وروسيا اللى هما بدأوا بالفعل انهم يملوا الفراغ الامريكي في المنطقة العربية ، عشان يلاقي بايدن ان مخاوفه بقت حقيقة وان التنين الصيني والدب الروسي بقي ليهم تحالفات مع الدول العربية .

وحتي لما كان بايدن في طيارته عشان يزور السعودية خرج علينا مسؤولين سعوديين يقولوا انه من غير الوارد ان يكون في انقلاب علي روسيا والصين اللى انضموا للحلف النفطي الصغير "اوبيك بلس" وكان بيدعم السعودية "مصر والامارات" اللى عجبتهم فكرة التنويع في التحالفات وبني جسور جديدة مع العالم الجديد  اللى بتتزعمه موسكو وبكين .

وده اللى اكدته وكشفته رئيسة المنتدي الدولي لدول مجموعة البريكس ، "بورنيما اناند" وهو ان مصر والسعودية هاينضموا قريب جدا الى مجموعة بريكس ، وقالت في تصريحها لجريدة "إزفيستيا"  الروسية ان الصين وروسيا  والهند اتناقشوا  ورحبوا بانضمام مصر والسعودية للتحالف وان التحالف علي اعتاب اعضاء جدد هم "مصر والسعودية وتركيا واندونيسيا والارجنتين"

ولو نظرنا من الناحية الاقتصادية لانضمام الدول دي لتحالف بريكس هنلاقي ان التحالف ده هايكون التحالف  الاقوي والاكبر والاضخم وهاتضم دول كبيرة من حيث السكان والموارد ، وفيها كمان تاني اقوي قوة عسكرية علي الكوكب والقوة التالته هي الصين والرابعه وهي الهند ، كمان هاتكون بتضم اكبر منتج ومصدر للنفط فالعالم اللى هي "السعودية" ، وهاتضم واحدة من اكبر واقوي الدول في افريقيا والشرق الاوسط اللي هي "مصر" ، ده بالاضافة لاغني بلد في القارة الافريقية "جنوب افريقيا" ، واكبر بلد اسلامي في العالم "اندونيسيا" .

كل دول مع بعض هايكونوا قوة لايستهان بيها ، واللافت للامر ان صعود القوة والتحالف الجديد هايترافق مع سقوط لاركان العالم القديم ، والكلام هنا عن اوروبا اللى اتهاوت عملتها الموحدة لاول مرة من 20 سنه ، وكمان الضربة اللى تلقتها بسبب انسحاب "بريطانيا" من الاتحاد ، وتفكير "المانيا" و "فرنسا" من الانسحاب ايضا .

وفوق كل ده الازمة الاقتصادية الكبيرة اللى ضربت "ايطاليا ، والاخير حرب روسيا علي اوكرانيا اللى كانت بداية لانهيار تحالف العالم القديم ، ده غير ازمة الوقود اللى بتعيشها القارة العجوز بسبب الحرب دي  .

وده يأكد ان ركن اساسي من اركان العالم القديم بدأ بالانهيار وفنفس الوقت ظهر لاعب جديد عشان يعيد تشكيل العالم ، وده مش صدفه لاني كتبت وقولت انه من سنه 2009 قررت روسيا انهاء مايسمي بالعالم احادي القطب وده امر فهمه كتير من السياسين والاقتصاديين في العالم .

وبكده نقدر نفهم سبب تصريحات "ولي العهد السعودي" "محمد بن سلمان" لما قال سنه 2018 ان الشرق الاوسط هايكون اوروبا الجديدة  ، وبصراحة مفيش فرصة لوراثه القارة العجوز افضل من دي  ده لو احسن قادة المنقطة استغلالها لان القوي الجديدة في العالم اللى بتتمثل في روسيا  و الصين بتسعي لكسب ودهم  واللى مكنهم من كده الادارة الامريكية نفسها .

ومع صعود نجم التحالف الجديد زي بريكس هاتنتهي تحالفات تانية زي حلف الناتو اللى اتنبأت امريكا من كام سنه بسقوطه وانهياره ده مع سعي امريكيا بإقامة حلف جديد يضم الدول الناطقة بالانجليزية وحمل اسم التحالف "تحالف اوكوس" عشان يكون وريث لحلف الناتو وهايكون المقابل ليه هو حلف "بريكس بلس"

وهنا هانكون قدام عالم جديد غير العالم اللى عرفناه طول ال 30 سنه الاخيرة ، عالم الفرصة فيه سانحه فيه وبقوة لحجز العرب مقعد مهم فيه لو احسنوا استغلال الفرصة دي .