جوليان أسانج، طيب ولا شرير؟

 

"جوليان اسانج" مؤسس "موقع ويكيليكس"

إعداد وكتابة : أحمد مصطفي 

يوم 17 يونيو 2022 طلع لينا بيان وقرار  مفاجيء من  بريطانيا من خلال وزارة الداخليه بخصوص "جوليان اسانج "  , طبعا القرار قوبل بالرفض الشديد من قبل انصار جوليان اسانج ، وفي نفس الوقت رحبت امريكا بالقرار ده .

فا ايه هو القرار ؟ ومين هو جوليان اسانج ؟

علشان نعرف القصة كاملة هنرجع لسنه 2010 ، في السنه دي هزت العالم كله فضيحه من العيار التقيل ، اللى كان وراها موقع  "ويكيلكس" اللى نشر الالاف الوثائق السرية اللى كشفت عن معلومات حساسة ماكنش المفروض انها تظهر ابدا ، الوثائق اللى كان فيها صور وفيديوهات ماكنتش مقتصرة علي الحروب بس ، دي كانت تشمل كمان الجيوش ، والامن الوطني ، والبرلمانات , وحتي السينما .

ومن اكتر الوثائق المهمة كانت تخص امريكا في "العراق: و "افغانستان" وعن جرائم مرتكبه بحق المدنين هناك .

طيب هو ايه "موقع ويكيليكس" ؟ 

"موقع ويكيليكس"

شوف ياسيدي موقع "ويكيليكس" اتأسس سنه 2006 علي ايد المقرصن "جوليان اسانج" ، اللى قدر يسرب معلومات بمساعدة محلل بيانات في المخابرات الامريكية ،  اسمه "تشيلسي ماننغ" ومن هنا بدأت الملاحقات القانونية لكل العاملين في "موقع ويكيليكس"

اللى كان علي راسهم الاسترالي "جوليان اسانج" اللى تم اعتقاله سنه 2010 لما كان في بريطانيا بطلب من السويد اللى صدرت فيها مذكرة توقيف واعتقال دولية عشان بتتهمه فيها بانه اعتدي جنسيا علي واحدة وقت ماكان في السويد .

طبعا اسانج نفي الاتهامات دي واللى تم وضعه تحت الاقامة الجبرية , وفنفس الوقت كان بيخوض معركة قضائية ضد السويد ، واللى خسرها سنه 2011 ووقتها اقرت محكمة جزئية تسليمه للسويد ، وده اللى ايدته المحكمة البريطانيه العليا , علي الرغم من طعن "جوليان اسانج" علي الحكم .

وبعد كام يوم راح "جوليان اسانج" علي سفارة الاكوادور في لندن وطلب اللجوء السياسي هناك، وفعلا تم منحه حق اللجوء السياسي فيها سنه 2012 ، بأمر من رئيس الاكوادور "رافائيل كوريا" ، وفضل اسانج في سفارة الاكوادور لمدة 7 سنين ، حصل وقتها علي الجنسية الاكوادورية .

لكن سنه 2019 تم تعليق الجنسية وتم سحب حق اللجوء لاسانج , وده بسبب تغيير الحزب الحاكم في الاكوادور .

"جوليان اسانج" من داخل "سفارة الاكوادور" 

وتم القبض علي اسانج من قلب السفارة في لندن ، وتم احتجازة بتهمه عدم تسليم نفسه للمحكمة ، وده علي الرغم من اسقاط السويد كل التهم اللى كانت وجهتها ليه ، وده بالاضافة لحصول "جوليان اسانج" علي تأييد سابق من "الامم المتحدة"  اللى اعلنت ان تم اعتقاله تعسفيا ، وطالبت بتعويضه بسبب "حرمانه من الحرية" .

الغريب بقي ان بريطانيا اصرت علي ان التأييد ده مش هايلزمها قانونيا علي الافراج عن "جوليان اسانج" اللى موجود في سجونها من 2019 من وقت اعتقاله .

لحظة القاء القبض علي "جوليان اسانج"

اما امريكا بقي وجهت 17 اتهام لمؤسس "موقع ويكيليكس" وده بسبب انتهاكه قانون التجسس ، وتعريضه لحياة الناس للخطر من خلال "موقع ويكيليكس"

"جوليان اسانج" دلوقتى بيواجه اتهامات  بيصل اجمالي عقوباتها 175 سنه

واخيرا اسانج ليه 14 يوم للاعتراض علي قرار ترحيله لامريكا ، وفحال رفضت المحكمة البريطانيه الطلب ، فاهيضطر اسانج الامتثال للقرار خلال شهر.

سؤال المقال للقاريء : هل هيتم ترحيل "جوليان اسانج" الى امريكا ؟