يعني ايه احتياطيات الدهب

 

سبائك دهب

دايما بنعتبر ان  "الدهب" هو من اغلي واثمن المعادن ، اللى يقدر اي شخص او اي حكومة انها تمتلكه ، من الالاف السنين لعب الدعب دور كبير جدا في الانظمة العالمية واصبح ملاذ امن لكتير من الحكومات في حال احتاجت استخدامه وقت الازمات .

ومن هنا بدأت أهمية "احتياطيات الدهب" ، ولكن يعني ايه مصطلح "احتياطيات الدهب" ؟

"احتياطي الدهب" هو المخزون اللى بيحتفظ بيه البنك المركزي لاي دولة وبيهدف بشكل اساسي في ضمان تسديد ديون الدولة ودعم قيمة "العملة الوطنية" .

سبائك دهب

وممكن تسأل ايه اللى يخلي "الدهب" ملاذ امن للدول ؟

احيانا بتحتاج الدول لطباعة المزيد من العملات النقدية عشان تتفادي التقلبات والانتكاسات الاقتصادية  ، ولكن ده بيجي علي حساب تخفيض قيمة العملة الوطنية ، لكن "الدهب" ولانه محدود في الطبيعة ومن الصعب زيادة حجمه فاهو بيشكل حماية تلقائية ضد "التضخم" مثلا ، كمان اللى بيزيد من جاذبية "الدهب" هو نقائه وصفائه وندرته ، لان "الدهب" لا بيصدي ولا حتي تقدر تذيبه بالاحماض ، كمان بتكمن قوة "الدهب" في انه يمكن استخدامه في وقت ، وخلال الازمات كعملة للتداول ، يعني تقدر تبيعه وتشتريه وخصوصا علي المستوي الدولي .

لما نرجع بالزمن لورا شوية هنلاقي ان "الدهب" كان بيستخدم في التجارة بين الدول في السنين اللى سبقت "الحرب العالمية الاولي" ، فالبلاد اللى كان عندها فائض تجاري كانت بتخزن "الدهب" من خلال مدفوعات صادرتها ، لكن الدول اللى كانت بتعاني من العجز التجاري  فكانت بتنخفض احتيطاتها من "الدهب"  عشان كانت بتستخدمه في الاستيراد .

سبائك ذهب

ولو القينا نظره عن "احتياطيات الدهب" في بعض الدول .

هنلاقي ان "الولايات المتحدة الامريكية" عندها اكبر مخزون دهب علي الاطلاق ، حوالي 8 الاف طن من "سبايك الدهب" .

وبتيجي "المانيا"  في المركز التاني باحتياطي 3360 طن من "الدهب"

ايطاليا في المركز التالت باحتياطي 2450 طن من "الدهب"

في العالم العربي بتحتل "السعودية" المركز الاول في "احتياطيات الدهب" ب 323 طن من "الدهب"

وبتيجي "لبنان" في المركز التاني باحتياطي 287 طن من "الدهب"

وبتيجي "الجزائر" في المركز التالت ب 174 طن من "الدهب"

وده لان الدهب لا يحمل اي مخاطر ائتمانية ، فهو بيرمز لاستقلالية الدولة اللى بتملكه وده بيخليه احد اهم الاصول الاحتياطيه  للدول .

وعلي حسب بيان "مجلس الذهب العالمي" انه من المرجح انه تزيد "البنوك المركزية" للدول احتياطياتها من "الدهب" خلال ال 12 شهر اللي جايين ، وبيقول المجلس ان السبب في ده هي المخاوف المتصاعدة من حصول "ازمة مالية عالمية"  جديدة .

إعداد وكتابة : أحمد مصطفي