الديانة الرائيلية

"الديانة الرائيلية"

يوم 13 ديسمبر سنه 1973 خرج الصحفي الفرنسي كلود فوريلون عشان يروح مكتبه كالعادة لكن محدش كان يتوقع انه هايغير مهنته من صحفي ل نبي ومش اي نبي لا ده بيبلغ رسالته  من وحي مخلوقات الفضاء

كلود فوريلون

اعداد وكتابة : أحمد مصطفي

يوم 13 ديسمبر سنه 1973 خرج الصحفي الفرنسي كلود فوريلون عشان يروح مكتبه كالعادة لكن محدش كان يتوقع انه هايغير مهنته من صحفي ل نبي ومش اي نبي لا ده بيبلغ رسالته  من وحي مخلوقات الفضاء

وعلي لسان نبي الكائنات الفضائية انه شعر بانجذاب لقمة بركان ف راحله واول ماوصل شاف نور احمر بيقرب منه

ولما بدا الضوء يقرب طلع انه وحي جاي من الفضاء علي شكل طبق طاير نزل منه مخلوق شبه الانسان طوله 120 سم بشرته مديه علي اخضر كده  عنيه شبه اللوزه  وشعره طويل وعرف وقتها ان ده وحي  الوحي الفضائي بلغ كلود اول كلماته رسالته اللى لازم ينقلها للبشر

وكان نص الرسالة كالاتي :ستبلغ الكائنات البشرية عن هذا اللقاء وتخبرهم اننا نحن الالوهيم من خلقنا البشر وبناء علي ردات فعلهم سنري ما اذا كنا سنكشف انفسنا رسميا لهم

بعدها بقي فوريلون هو النبي بتاع الفضائيين وغير اسمه لرائيل وبعدين اتعلم من المخلوق الفضائي قصة  الخلق اللى اسست للديانة الرائيلية واللى هي قائمة علي ان اللي خلق البشر هو الاولوهيم الفضائي  وده زي مابيقول رائيل ان دول تجسيد لقوم موجودين من وقت طويل علي كوكب تاني

وان التطور وصل بيهم الي انهم يتقنوا علم الجينات الى حد خلق الحياة من قبل 25 الف سنه من خلال حمض ال دي  ان ايه

وادعي ان الاولوهيم لف الكون كله عشان يلاقي كوكب تاني ملائم للحياة عشان يواصل اختباراتهم فا لقوا اللى بيدوروا عليه في الارض  اللى بنوا فيها مختبراتهم

ووصل لرائيل انه الاولوهيم خلقوا النباتات الاول وبعدين الحيوانات واخيرا خلقوا البشر اللى هما احنا يعني

وانهم في البداية حفظوا النباتات والحيوانات والبشر في المختبرات اللى هما عملوها

لكن اكتشفوا ان الانسان ليه طبيعه عدوانية فطردوه من المختبرات حاجة كده زي طرد ادم من الجنه

وان الانبياء سيدنا موسي وعيسي وسيدنا محمد هما اصلا انبياء ورسل من الاولوهيم بس عندهم حمض نووي متميز

ليه بقي مميزين عشان هما استغفر الله العظيم اتولدوا لاباء من الاولوهيم  وامهات من بنات البشر  حاجه كده قمة في الهرتله  استغفر الله العظيم يعني

ووصلت هرتله صاحب الديانة الرائيلية انه فعلا خلال زيارة لكوكب الاولوهيم يوم  7 اكتوبر سنه 1975 قابل الانبياء من الرسل زي سيدنا موسي وسيدنا عيسي وسيدنا محمد علي افضل الصلاة والسلام

من هنا بقي نتكلم عن مباديء وطقوس الديانه دي

عندهم طقوس اسمها طقوس الجنس والاستنساخ

علي الرغم من وجود طوائف كتيرة بتؤمن بالكائنات الفضائية الا ان اتباع الديانة الرائيلية بيميزوا نفسهم عنهم بانهم بنوا سفارة لهم في اسرائيل تمهيد لوصول الاولوهيم للارض في مشهد كده زي يوم القيامة وده فتح الباب لتكهنات حول علاقة الديانة الرائيلية بالديانه اليهودية  خصوصا و ان الشعار الاصلي بتاعهم هو نجمه داوود وجواه صليب معقوف زي شعار هتلر لكن رائيل عشان يحافظ علي مشاعر اليهود والامهم  من النازية فاهو خد اذن من الاولوهيم عشان يغير الشعار وبقي نجمة داود جواها كوكب بيدور

رمو الديانة الرائيلية

 لكن رفض اسرائيل ان رائيل يبني سفارة للاولوهيم في تل ابيب خلي رائيل يهددهم بسحب الاولوهيم حمايتهم ليها من جيرانها العرب

 

وبيتم انتساب المنتميين للديانة الرائيلية بعدم ما يرتدوا عن دينهم الاصلي يعني يشرك بدينه وبعدين ينضم للديانة الرائيلية

عن طريق  تعميدهم في كنيستهم بطريقة بيسموها طريقة الخطط الخلوية  واللى بيقوم بالطقوس دي مجموعة من المتمرسين في الديانة وبيسموا انفسهم بالمرشدين

 

 

عدد الطائفة

حسب كلام الرائيلين بيقولوا انهم من يوم ماتم انشاء الديانة الرائيلية سنه 1973  لحد دلوقتى انتشروا في اكتر من 84 دولة وعدد المنتمين للديانة في الدول دي هو 55 الف شخص

لكن علي الرغم من ان بعض الناس شاف فيها حركة مسلية للبداية لكن الموقف منها اتغير بعد ما اتكشف عن طقوس وعبادات بتهدد بالخطر علي  البشر  فالجنس عند اعضاء الديانة هو طقس اساس من طقوس الديانة وانه تقرب من الخالق الاولوهيم واتنشر ليهم فيديو قدر يصوره مصور سري الفيديو كان اعضاء الديانة الرائيلية بيمارسوا الجنس جوا الخيام في مخيم للعراه والغريب ان اعضاء الديانة دي مابيشفوش في الجنس اي عيب لا بالعكس ده جزء اصيل من عبادتهم  سواء كان العلاقة دي بين جنسين او جنس واحد  او حتي علاقة جماعيه في وقت واحد لكن الاغرب بقي هو راي رائيل عن الموضوع ده وقال انه لما الكائن الفضائي خده عشان يزور الاولوهيم مارس الجنس مع 6 ستات وهم روبوتات جنس

 

اما بقي النظام السياسي اللى بتروج ليه الرائيلية ان الحكم بيكون للعباقرة بس لدرجة ان الانتخابات غير مسموح بيها لغير الاذكياء بس يعني انا واللى زيي مالناش عيش معاهم .

وفي الختام حابب اقول  الحمد لله علي نعمة الاسلام وكفي بها نعمة